တင်မိုး၏ အမှာ
မြန်မာကဗျာလောကတွင် ဘာသာပြန်ကဗျာစာအုပ်ဟူ၍ ထုပ်ထုပ်ပိုက်ပိုက်ပြုစရာ အနည်းငယ်သာ ရှိပါသည်။ တင်မောင်အေးက ဂျာမန်ကဗျာစာဆို ဗားတော့ဗရက်၏ ကဗျာအသီးအနှံများကို မြန်မာကဗျာကျီတိုက်ထဲသို့ သွင်းနှံလောင်းဖြည့်လိုက်သောအခါ ၀မ်းမြောက်ဖွယ် ကောင်းမှုတရပ်ပင်ဖြစ်ပါပေသည်။
တင်မောင်အေး၏ ဘာသာပြန်လက်ရာသည်ကောင်း၏ သို့မဟုတ် မကောင်း၏ဟူ၍ ဝေဖန္တိကပြုရန် ကျနော် မစွမ်းပါ။ သို့ရာတွင် တင်မောင်အေးသည် ကဗျာဘာသာပြန်ရာတွင် လက်စိမ်းတယောက်မဟုတ်ပါဟူ၍ကား ပြောနိုင်ပါသည်။ သူသည် ဒေါက်တာအက်ပတ် စုဆောင်းပုံနှိပ်အပ်သော ဂျာမန်မြန်မာကဗျာစာအုပ်တွင် ဂျာမန် ကဗျာစာစုကို မြန်မာဘာသာပြန်ဆိုခဲ့သူ လူငယ်တဦးပင်ဖြစ်ပါသည်။
ကျနော်တို့ မြန်မာကဗျာပရိသတ်သည် အများအားဖြင့် အင်္ဂလိပ်နှင့် အိန္ဒိယတို့မှလာသော ကဗျာအငွေ့အသက် များကို နစ်းရှိုက်လေ့ရှိပါသည် (၀ါ) နမ်းရှိုက်ခွင့်ရလေ့ရှိပါသည်။ အခြား မျိုးတူရေခြားနိုင်ငံများမှ ကဗျာတို့နှင့် အထိအတွေ့ အလွန်နည်းပါသည်။ တင်မောင်အေးသည် မြန်မာကဗျာနှင့် ဂျာမန်ကဗျာအကြား ပေါင်းကူးတံတား ထိုးပေးလိုက်ပါသည်။
ဗားတော့ဗရက်၏ကဗျာများကို ဖတ်ကြည့်ရသောအခါ စစ်မောင်းသံကို ကြားလိုက်ဘိသကဲ့သို့ ကြက်သီးမွှေးညှင်း ထလာပါသည်။ ဆံပင်မွှေးထောင်လာပါသည်။ ကဗျာများ၏အသံမှာ ဟိန်းလှပါသည်။ ကဗျာတေးသံမှ ဟုတ်ကဲ့ လား။ ကျည်ဆံတွေများလား။ ဤသို့ခံစားမိပါသည်။ ကျနော်သာ နာဇီဖက်ဆစ်ဖြစ်ပါသမင့် ဤနေရာတွင်ပင် ပွဲချင်းပြီး ကျဆုံးဖွယ်ရှိပါသည်။ ဤကဗျာများသည် ကဗျာများမဟုတ်။ လူများပါပေတကား။ ပြည်သူ သိန်းသန်းပါ ပေတကား။ ဤသို့မှတ်ချက်ချမိပါတော့သည်။
ဗားတော့ဗရက်၏ကဗျာများကို ဖတ်ကြည့်တော့မှ တင်မောင်အေး ဘာ့ကြောင့် သည်ကဗျာတွေကို ပြန်ချင်ကြောင်း နားလည်လာရသည်။ ဆိုရှယ်လစ်နိုင်ငံတကာတည်ဆောက်ရာတွင် ဤကဗျာများသည် မည်မျှအဖိုးတန်ကြောင်း သဘောပေါက်လာရသည်။ ဤကဗျာများသည် ဆိုရှယ်လစ်စိတ်ဓာတ်ကို ပုံသွန်းသော ဗိသုကာဖြစ်မည်မလွဲတည်း။
ဤမျှထက်ပို၍ ကဗျာအကြောင်းမပြောလိုပါ။ ကဗျာများကို ဖတ်လိုက်မိလျှင် ဖတ်သူ၏နှလုံးစိတ်ဝမ်းထဲ၌ ဤကဗျာများ အသက်ရှင်လှုပ်ရှားနေတော့မည်ဖြစ်ရာ ကျနော်ကနှစ်ဖြူးနေစရာမလိုပါ။ ကဗျာများကို ဖတ်ဖြစ်အောင် ဖတ်ကြည့်ပါဟု တိုက်တွန်းနှိုးဆော်ရုံသာ ရှိပါသည်။
တင်မောင်အေးသည် စိတ်အားထက်သန်လှသော၊ အကျိုးများမည့် စွန့်စားမှုများကို ခုံမင်လှသော၊ ကဗျာကို အလွန်ချစ်တက်သော လူငယ်တဦးဖြစ်ရာ နောက်ထပ်၍ ကျနော်တို့က မတိုက်တွန်းစေကာမူ သူကတော့ ဆက်လက်ကြိုးစားထုတ်ဝေဦးမည်မှာ ယုံမှားဖွယ်မလိုပါ။
“ကျနော်တို့လူငယ်တွေဟာ ကျနော်တို့ကိုယ်ကျိုးကိုယ်စီးပွားသက်သက်အတွက် အသက်ရှင်နေမယ်ဆိုရင် ဘယ်မှာအသက်ရဲ့တန်ဖိုးရှိတော့မလဲဗျ” ဟူ၍ တတွက်တွက် ဂါထာရွတ်လေ့ရှိသူ တင်မောင်အေးက ဗားတော့ဗရက်၏ ကဗျာများကိုမှရွေး၍ ထုတ်ဝေလိုက်သည်မှာ ချီးကျူးရန်မှတပါး အံ့သြရန်မရှိပေ။ လုပ်သင့်လုပ်ထိုက်သော ကောင်းမှုတရပ်ကို ပြုခြင်းမျှသာဖြစ်ချေသည်တကား။
0 comments:
Post a Comment